Törkiyä suğıştan qaçıp kitkän Ukraina watandaşların qabul itte

Törkiyä êçke êşlär ministrı urınbasarı häm ministrlıq süzçese İsmail Çataklı Ukrainada yäşängän bäreleşlär säbäp bulğan migraśiya xäräkäte mäs’äläsendä yazmaça belderü yasadı.

Ukrainadan migraśiya xäräkäteneñ başlanuı belän bergä bu ilgä humanitar yärdäm yök maşinaların cibärülären belderüçe Çataklı: “Rumıniya çigendä Afät häm ğadattän tış xällär idaräse törkemnäre 2 küçmä aş bülmäse häm standartları belän här kön 10 meñ keşegä qaynar rizıqlar birä”, - dip äytte.

Yaqınça 10 yök maşinasınnan torğan humanitar yärdämne bu atnada da (7nçe-11nçe mart könnärendä) töbäkkä cibäräçäklären citkerüçe Çataklı aldıbızdağı könnärdä dä yärdäm kürsätüne däwam itäçäklären belderde.

Törkiyäneñ çik buyı qapqalarında kiçülärdä ciñellekneñ buldırıluına häm prośeduralarnıñ tiz başqarıluına basım yasawçı İsmail Çataklı: “Bu qısada 24nçe fevral’dän birle böten çik buyı qapqalarıbızdan 20 meñ 550 Ukraina watandaşı ilebezgä kerde. İlebez belän Ukraina arasında ğamäldä bulğan vizadan azat itü kileşüe qısalarında Ukraina watandaşları ilebezgä pasport yäki tanıqlıq (êçke pasport) belän kerä ala häm vizasız 90 kön qanuni (zakonlı) räweştä ilebezdä qala ala. Bäreleşlär başlanğançı ilebezgä qanuni bularaq kergän, läkin kitä almağan Ukraina watandaşlarına isä yäşäw röxsäte möräcäğätlärendä kiräkle ciñellekneñ kürsätelüe öçen vilayät idarälärenä boyırıq birelde”, - dip äytte.

“Ukraina watandaşları arasında 6nçı marttan birle 551 qırım tatarı häm mesxet (axıska) törekläre ilebezgä kilde. İlebezgä törkemnär belän yäki individual’ bularaq kilgän qırım tatarları häm mesxet (axıska) töreklärennän 257 qırım tatarı häm 15 mesxet (axıska) törekläre Ädirnädä häm 204 qırım tatarı isä Kırklarälindä Migraśiya idaräse koordinaśiyasında Ädirnä häm Kırklaräli gubernatorlıqları tarafınnan tulay toraqlarğa urnaştırıldı”, - dip mäğ’lümat birüçe Çataklı: “Monnan tış Ukrainadan kitep üz illärenä êvakuaśiyälängän yäki qaytırğa tırışqan 1 meñ 711 Azärbaycan, 447 Törekmänstan, 62 Gruziya watandaşı isä tranzit kiçü öçen ilebezgä kerde”, - dip bilgeläp uzdı.