Ärdoğan: "Êşlär ällä-ni äybät tügel"

Törkiyä ilbaşı Räcäp Tayyip Ärdoğan kiçä BMO ğomum şurası utırışları öçen kitkän Amerika säfären tögälläde. Qaytır aldınnan ul N’yu-York şähärendäge yaña diplomatik bina Törek yortında belderülär yasadı.

Ärdoğan bolay dide: “Min êlekkege ilbaşları - keçe Buş belän yaxşı êşlädem, xörmätle Obama belän yaxşı êşlädem, xörmätle Tramp belän yaxşı êşlädem, tik xörmätle Bayden belän yaxşı başladıq diyä almıym”.

Törkiyä ilbaşı ike NATO däwläteneñ ber-bersenä doşmança tügel, dustanä möğamälä kürsätüen teläwen citkerde. “Älegä êşlär ällä-ni äybät tügel,”-dide ul.

Ärdoğan: “Baydennıñ terrorçı oyışmalarına qoral, suğış kiräk-yaraqları, texnika taşuın qarap torırğa cıyınmıybız,”-dip belderde. Ul: “Bezgä Rusiyädän satıp alınğan raketa saqlanu sisteması S-400 mäs’äläsen sıltaw itep F-35lärne birmäw - däwlätlär arasındağı mönäsäbätlärdä diplomatiyä yağınnan da, bağlanışlar nisbätennän dä şäxes buluın kürsätmi,”- dip AQŞnıñ ğadel bulmawın assızıqladı.

Ärdoğan Äfğanstanda idaräne üz qulına alğan Talibanğa kilgändä isä : “Xäzerge poziśiyälärenä qarağanda, qızğanıçqa, üz qanatı astına aluçı häm sıyındıruçı xakimiyät barıp çıqmadı,”-dide. Ul Talibannıñ qulındağı qorallarğa iğ’tibarnı cälep itte. “Alar Amerika qoralları. Taliban monıñ öçen tülärgä mäcbür bulaçaq,”-dide Törkiyä ilbaşı.