"Kanal İstanbul" 13 tapqır qurqınıçsızraq

Törkiyä ilbaşı Räcäp Tayyip Ärdoğan uzdırılğan tikşerenülärneñ “Kanal İstanbul”dağı köymä xäräkäteneñ, Bosfor buğazına qarağanda,13 tapqır qurqınıçsız uzaçağın kürsätüen belderde. Ul Kitapxanä äñgämäläreneñ öçençesendä aspirantlar belän oçraştı. İlbaşı Millät kitapxanäsendä yäş’lärneñ sorawlarına cawap birde.

Ärdoğan “Kanal İstanbul” belän ber adım yasalunıñ şart ikänen assızıqladı. Ul Bosfor buğazınıñ tabiğat’kä här mizgeldä yanaw tudıra aluına iğ’tibarnı cälep itte. İlbaşı moña qadär bulğan qazalarnı xäterlätep bolay dip söyläde:

 “Bu hälakätlärdän bezneñ dä sabaq aluıbız kiräk. Bigräk tä yılda 45 meñ köymä uzuçı Bosfor buğazınıñ bu xäräkätne tağın da kübräk kütärä aluı mömkin tügel. Ütkärelgän farazlawlar 2050nçe yılda bu kürsätkeçneñ 78 meñgä citäçägen kürsätä, xäräkät daimi arta. Ä bit Bosfornıñ korablar imin räweştä uza alırlıq tranzit sıydırışlılığı nibarı 25 meñ. Buğaznı ütep yörü öçen yaba almıybız, şuña kürä artqan xäräkätne qanäğat’länderü öçen qulıbızda ber mömkinlek qaldı, ul da – “Kanal İstanbul”.  

Ärdoğan belgeçlärneñ “Kanal İstanbul” aşa köymälärneñ uzuınıñ 13 tapqır qurqınıçsızraq bulaçağın äytüen xäterlätte. “13 tapqır imin şartlar turında süz barğanda, Bosfor buğazına yabışıp yatunıñ ber mäğ’näse barmı? Tankerlar, zur yök korabları… Monnan soñ alar öçen Bosfornı yabıp, barısın “Kanal İstanbul”ğa cibärüebez kiräk,”-dip söyläde Törkiyä ilbaşı Räcäp Tayyip Ärdoğan.