İstanbuldağı Çamlıca manarası qullanılışqa tapşırıldı

Awrupanıň iň biyek qorılması bulğan İstanbuldağı Çamlıca manarası ilbaşı Räcäp Tayyip Ärdoğan qatnaşında qullanılışqa tapşırıldı.  

İlbaşı açılış tantanasında yasağan çığışında televideniye, radio, media oyışmaları belän êlemtä operatorlarına xezmät kürsätäçäk Çamlıca manarasınıň Törkiyägä häm İstanbulğa xäyerle buluın teläde.

Ärdoğan Törkiyädä genä tügel, böten dönyada ürnäk bulırlıq proyektnı uňışlı tormışqa aşıruların belderde, êlemtä häm teleradiotapşırular êşçänleklärendä berdänber tapşırğıç qorılması bularaq qullanılğan manara yärdämendä vizual’ pıçranunıň betüen assızıqladı.

İlbaşı äytüençä, alar bu model’ne şartlar bulğan şähärlärdä kiňäytergä uylıylar, bu räweşle äylänä - tirä moxitne pıçranudan qotqarıp xezmät sıyfatın da kütäräçäklär.

587 metr biyeklegendäge manara - İstanbulnıň iň biyek qorılması. Ärdoğan bilgeläp ütkänçä, manara êçendäge sośial’ ob’yektlar Törkiyä turizmına da zur öleş kertäçäk.

İlbaşı iyün’ ayı azağında İstanbul kanalı proyektına da nigez salınaçağın belderep bolay dide: “Bu proyekt tögällängändä İstanbulnıň geografik, strategik häm tabiği maturlığı tağın ber tapqır artaçaq”.