"Törkiyägä “genośid” yarlığın tağa almassız"
Törkiyä ilbaşı Ärdoğan Djo Baydennıñ süzlärenä cawap birde
Bügen Törkiyä ilbaşı Räcäp Tayyip Ärdoğan kabinet cıyılışınnan soñ AQŞ liderı Djo Baydennıñ 1915nçe yılğı waqıyğalar xaqındağı süzläre belän bäyle belderü yasadı. Ul Amerika däwläte başlığınıñ 1 ğasırdan êlek bulğan xällärne nigezsez häm säbäpsez räweştä “genośid” dip atawın kisken tänqıyt’läde. “Moña radikal’ ärmän oyışmaları häm Törkiyägä qarşı törkemnär basımı arqasında urın birelüen uylıybız,”-dide Ärdoğan. Ul Baydennıñ süzläreneñ döreslekkä turı kilmäwen assızıqladı.
“AQŞ häm Awrupa bezneñ belän tarix temasında yarış başlasa, keşegä kürenä almastay xälgä kilerlär. Monı bez tügel, awrupalı tarixçılar äytä. Ägär genośid disägez, başta közgegä qarap üzegezne tikşerergä kiräk,”-dide Törkiyä ilbaşı. Ul Ğosmanlınıñ ärmän xalqın başqa cirlärgä sörmäwe, üz mäydannarında urın üzgärtüe xaqında äytte. Alarğa ber atna waqıt birelgän, sıltawı bulğannar azat itelgän.
“Cibärelgän häm küçerelgän ärmännärneñ sanı AQŞ xisaplarında 600 meñ bularaq kürsätelä, çın sannar monnan azraq,”-di Ärdoğan. İlbaşı bik küp urında ul çorda ärmännär ütergän töreklärneñ kümäk qaberlekläre barlığın, ämma hiçber cirdä ärmännär cirlängän kümäk qaberleklär oçramawın assızıqladı.
“24nçe aprel’dä keşelek faciğase bulmadı. 1915nçe yılnıñ 24nçe aprelendä Ğosmanlı däwläte üzenä qarşı êşçänlek alıp barğan oyışmalarnı yabıp 235 idaräçesen qulğa ala. Ärmän bandaları törek armiyäse yäisä şähärlärne saqlawçılar belän suğışmağan, alar ber ğayepsez keşelärne ütergän. Barlıq döreslek ap-açıq ikän, tiktomal törek xalqına, Törkiyägä “genośid” yarlığın tağa almassız,”-dide Ärdoğan. Ul tarixtağı waqıyğalarnı tikşerü häm xaqıyqat’ne tabunıñ säyäsätçelär tügel, tarixçılar êşe buluın assızıqladı. “Niçä yıl êlek yasalğan ärmän bäxäsläre mäs’äläsendä urtaq tarixi komissiyä qoru täq’dimebezgä äle cawap kilmäde,”-dip belderde Räcäp Tayyip Ärdoğan.
