Törkiyä belän BioNTex vakśina xaqında kileşte

Törkiyä sälamätlek saqlaw ministrı Fäxretdin Koca koronavirusqa qarşı yasalğan BioNTex vakśinası belän bäyle kileşüneñ imzalanırğa äzer buluın beldergän ide. Ul Twitterdan irtänge säğat’ 4 tulıp 30 minutta dokumentqa qul quyıluın citkerde.

“Kileşügä qarağanda, bıyıl öçen ayırıp quyılğan häm saqlağıçta totıluçı doza miq’darı, professor Uğur Şahin beldergänçä, 550 meñ doza. Anıñ Törkiyägä yıl axırına qadär yäisä ğıynvar ayında kilüe kötelä.  Monnan tış, mart ayı axırına qadär ilebezgä 4 million yarım doza tapşırılaçaq. Kileşügä kürä, ike yaqnıñ söyläşüe näticäsendä 30 million dozağa qadär vakśinanı şul uq şartlarda alırğa mömkin,”-dip yaza ministr.

Fäxretdin Koca äytkänçä, kiçegü säbäbe citeşterüçeneñ, vakśina yasawda problemalar kilep çıqqanda, cawaplılıqnı qabul itärgä telämäwe belän bäyle.

Kileşüneñ tormışqa aşırıluı häm kirtälärneñ beterelüendä vakśinanı uylap tapqan professor, BioNTexqa nigez saluçı Uğur Şahinnıñ öleşe zur bula.

“Törkiyägä birgän östenlege onıtılmayaçaq. Aña millätebez isemennän tağın ber qat räxmätemne citkeräm,”-di sälamätlek saqlaw ministrı Fäxretdin Koca.