"AQŞ sankśiyäläre belän suverenlığıbızğa tıqşına"

İlbaşı Räcäp Tayyip Ärdoğan AQŞnıñ sankśiyä qararlarınıñ Törkiyäneñ suverenlıq xaqlarına qarşı ap-açıq höcüm buluın belderde. Ul Niğdä- Änkara trassası açılışında çığış yasadı. Anda ilbaşı Rusiyädän S-400 saqlanu sisteması aluı öçen AQŞnıñ Törkiyägä qarata sankśiyälär kertüe xaqında süz alıp bardı. “Töp maqsatları ilebezneñ saqlanu sänäğatendä başlanğan adımnarğa yul quymıyça, bezne bäyle xälgä kiterü,”-dide ul. Anıñ äuytüençä, başqa hiçber däwlätkä bu sankśiyä kertelmägän. Täwge tapqır NATO äğ’zası bulğan ilgä qarata êşlänä.

“AQŞ üzennän  hawa saqlanu sistemaların alu öçen bernindi mömkinlek birmäde häm ixtiyacıbıznı başqa urında tabuıbız öçen “sankśiyä mıltığın” tözäde,”-dip söyli Ärdoğan. Ul bu qararnıñ ilneñ suverenlığına tıqşınu ikänenä basım yasadı.

“Sankśiyägä duçar bulğan saqlanu sänäğate idaräse başlığı İsmail Demir häm törkemen monnan soñ tağın da yaxşıraq yaqlayaçaqbız,”-di ilbaşı. Ul sankśiyä kertelüneñ saqlanu sänäğatenä ayaq çala almayaçağın, bu tarmaqta global’ lider bulu öçen êşçänlekne tizlätäçäklären citkerde. “Saqlanu sänäğaten här yaqlap bäysez xälgä kiterü öçen kiçägedän ike tapqır kübräk êşläyäçäkbez,”-dip söyläde Törkiyä ilbaşı Räcäp Tayyip Ärdoğan.