"Bezneñ Könçığışqa da, Könbatışqa da artıbız belän borılu niyätebez yuq"

Törkiyä Awrupa belän mönäsäbätlären üstergän waqıtta Aziyane häm Afrikanı da onıtmıy. İlbaşı Räcäp Tayyip Ärdoğan şulay dip belderde. Ul 12nçe tapqır uzuçı Galifaks xalıqara qurqınıçsızlıq forumına cibärgän videoyullamasında geografik nisbättän Afro – Awraziya däwläte Törkiyäne diplomatiyädä  tar qısalarğa kertüneñ yalğış häm mömkin tügellegen söyläde.

“Bezneñ Könçığışqa da, Könbatışqa da artıbız belän borılu niyätebez yuq. Awrupa belän mönäsäbätlärne üstergändä Aziya häm Afrikanı onıtmıybız. Rusiya belän soñğı çorda tiränäygän xezmättäşlegebezgä Amerika belän tirän bağ’lanışlarıbıznıñ al’ternativası bularaq qaramıybız. Bigräk tä 68 yıl äğ’zası bulğan NATOdağı poziśiyäbezgä zur ähämiyät biräbez. Törkiyäneñ çikläre ber ük waqıtta NATO çikläre. Bügen dä NATOnıñ yulındağı yaña sınawlar häm yanawlar qarşında ışanıçlı berlektäş bularaq ähämiyätle cawaplılıq alabız. Bu çınbarlıqqa tar säyäsi motivlar belän külägä töşerügä häm anıñ tikşerelüenä yul quymayaçaqbız. Bez ilebezneñ dä, berlektäşlärebezneñ dä xoquq häm mänfäğat’lären yaqlağanda, şundıy uq sizgerlek häm teläktäşlek ruxın berlektäşlärebezdän kötüebez tabiğıy,”-dip söyläde Ärdoğan.

Ul Törkiyäneñ xalıqara iminlek häm totrıqlılıqqa yanawlar qarşında nıqlı köräşen däwam itü ixtiyarına iyä buluın assızıqladı.