"Franŝuz tovarların satıp almağız"

Törkiyä ilbaşı Räcäp Tayyip Ärdoğan Franŝiyane boykot itärgä çaqırdı.

Ärdoğan Änkaradağı Beştepe Millät, Kongress häm Mädäniyät üzägendä “Mäwlid än-Näbi atnalığı”nıň açılış çarasında çığış yasadı.

Törkiyä ilbaşı Franŝiya däwlät başlığı Êmmanuêl’ Makronnıň İslamğa qarşı süzlärennän soň barlıqqa kilgän İslamofobik adımnar belän bäyle bularaq: “Franŝiyada zolım bar ikän, äydägez bergäläp andağı möselmannarnı da yaqlıyq dip dön’ya liderlarına möräcäğat’ itäm. Franŝiyaneň aqılğa moxtac liderı täşwike belän bu adımnar yasala başladı. Monnan xalqıma êndäşäm, franŝuz tovarların almağız,” – dide.

Germaniya başqalası Berlindağı Mäwlana cämiğına uzğan atnada yasalğan poliŝiya tentüe belän bäyle bularaq ta Angla Merkel’ğa möräcäğat’ itkän Ärdoğan bolay dide: “Sezdä din irege bar ide tügelme, sezdä dindä buluçılarnı däwlät yaqlamıy ideme? Niçek itep ber könne irtän 100dän artıq poliŝiya xezmätkäre cämiğqa kerä ala? Bolarnı Törkiyädä işetkänegez buldımı? Yuq, çönki bezdä çınnan da din irege digän närsä bar.”

Çığışında İslam häm möselmannarğa doşmanlıqnıň qayber Awrupa illärendä däwlät başlıqları däräcäsendä xuplanuçı säyäsätkä äylänüen açıqlağan Ärdoğan tübändägeçä däwam itte: “Sez çınlap ta faşist ikänsez, naŝizm çılbırınnan. Soňğı könnärdä barlıqqa kilgän waqıyğalar normal’ tügel. 6 million watandaşı Awrupada yäşäwçe inleň däwlät başlığı bularaq şunı äytäm: möselmannarnı doşman kürep bernärsägä dä ireşep bulmıy. Bu yulnıň axırı fäläkät bulaçaq. Rasaçılıq häm İslamofobiya keşene beterüçe psixoz bulıp tora. İlebez belän bäyle teläsä närsä söyläwçe Awrupa Parlamentı 3 maymılnı uynap, bu mäs’älägä bitaraf qala almıy.”