"Yoqtıruçılar sanın tağın da kimetep bu bäladän qotılıyq"

Törkiyä ilbaşı Räcäp Tayyip Ärdoğan Qorban bäyräme könnärendä koronavirus yoqtıru qurqınıçı turında kisätte. Ul İstanbulda änise häm ätiseneñ qaberenä barğannan soñ yasağan belderüdä Kovid-19dan saqlanu çaralarına bik nıq iğ’tibar itü kiräklegenä basım yasadı.

“Çistalıq, bitlek, sośial’ ara – bolarğa diqqat’le bulaçaqbız. Şul räweşle yoqtıruçılar sanın tağın da kimetep bu bäladän qotılıyq,”-dide ilbaşı.

Ärdoğan xalıqnı Qorban ğayete belän täbrik itte häm bu bäyrämneñ barlıq ğailälär öçen söyenü, berdämlek häm berlek säbäbe buluın teläde.  

Ul bıyılğı bäyrämneñ ber ük waqıtta Ayasofiya mäçeteneñ açıluına turı kilüen dä assızıqladı. “Bu da bezneñ öçen ayırım quanıç,”-dide Törkiyä ilbaşı.