"İstanbulnıñ töreklär qulında buluın qabul itä almıylar"

Törkiyä ilbaşı Räcäp Tayyip Ärdoğan İstanbulnıñ törek milläte häm möselmannarnıñ qulında buluın qabul itä almawların söyläde. Ul Milli küzläw oyışmasınıñ İstanbul töbäk idaräse yaña binası açılış tantanasında çığış yasadı.

“Yawlap aludan soñ ğasırlar ütügä qaramastan, äle haman İstanbulnıñ törek milläte häm möselmannarnıñ qulında buluın qabul itä almawların küräbez,”-dide Ärdoğan.

Ul Törkiyä yasağan här adım, här ğamälneñ dön’yanıñ iğ’tibarın cälep itüen söyläde.

“Ayasofiyanı ğıybadätkä açu prośessında İstanbulnıñ 1453tän birle törek cirläre buluın qabul itüdä awırsınuçılar barlığına şahit buldıq,”-dide ilbaşı.

Üz çığışında Ärdoğan Milli küzläw oyışmasınıñ Liviyädäge ğamällären dä telgä aldı.

“Liviyädä säyäsi çişeleş urınına xärbi yullarnı yaqın itüçe tüntäreleşçe Xafternıñ alğa baruın tuqtatuda Milli küzläw oyışması täêmin itkän mäğ’lümat häm operaśion yärdäm uyınnı üzgärtüdä zur rol’ uynadı. Tışqı küzläwdä yoğıntı mäydanıbız torğan sayın kiñäyä. Monıñ näticäsendä ilebez barlıq platformalarda regional’ häm dön’yaküläm köç bularaq urının ala başladı,”-dide ul.

Räcäp Tayyip Ärdoğan milli küzläw oyışmasınıñ kriptologiya, kiber kiñlek, iyärçen, signal küzläw mäydannarında da dön’ya külämendä êşçänleklär alıp baruın assızıqladı.