"BMO keşelek problemaların çişä almas"

Törkiyä ilbaşı Räcäp Tayyip Ärdoğan BMO iminlek şurasınıñ tözeleşen tänqıyt’läde. Ul İstanbulda uzğan 35nçe İSEDAK cıyılışınıñ ministrlar açılış utırışında çığış yasap: “Xäzerge qayğı-xäsrätlärgä çara bula almawçı BMO keşelek problemaların çişä almas,”-dide.

“BMO İminlek şurasınıñ daimi äğ’zalarınıñ 5seneñ arasında 1 seneñ dä xalqı möselman tügel. İkençe bötendön’ya suğışı ciñüçeläre tarafınnan tözelgän bu ğadelsez sistemanıñ däwam itüe mömkin tügel. Xalıqara iminlek tözüçeseneñ bügenge kön şartlarına turı kiterep qabat tärtipkä salınuı mäcbüri xälgä kilde. BMO iminlek şurasınıñ qorılışı dön’ya xalqınıñ geografik häm dini taralışın küz uñında totıp qabat bilgelänergä tiyeş,”-dide ilbaşı.   

Ärdoğan üz çığışında, monnan tış, Albaniyädä kiçä bulğan cir teträwdän soñ yaralarnı bäyläw öçen “bez yärdämğä xäzer” xäbären birde. İlbaşı islam dön’yasın da bu êşkä çaqırdı.  

“Cir teträw xäbären alğannan soñ kiçä tönlä Albaniyä xökümäte räise Êdi Ramağa şaltıratıp borçuların urtaqlaştım. Afät idaräse häm Qızılay törkemnärebez belän oçqıçta cibärelgän aşığıç yärdäm kiräk-yaraqlarınıñ ber öleşe anda barıp citte inde,”-dide Ärdoğan.