Törkiyä Süriyädä xärbi xäräkäten başladı

Törek qorallı köçläre Süriyäneñ tön’yağında PKK/YPG häm DEAŞ terrorçı oyışmalarına qarşı “Solıx çişmäse” xäräkäten başladı. Bu xaqta ilbaşı Räcäp Tayyip Ärdoğan sośial’ media xisabı Twitter aşa belderde. Yazma törek, ingliz häm ğaräp tellärendä birelde. Anda mondıy yullar bar: “Törek qorallı köçlärebez Süriyä milli armiyäse belän bergä Süriyäneñ tön’yağında PKK/YPG häm DEAŞ terrorçı oyışmalarına qarşı “Solıx çişmäse” xäräkäten başladı”.

 Ärdoğan maqsatnıñ Törkiyäneñ kön’yaq çiklärendä oyıştırılırğa mataşuçı terrorçılıq koridorın yuqqa çığaru häm regionğa tınıçlıq häm xozurnı kiterü buluın assızıqlıy. Anıñ äytüençä, xäräkät yärdämendä yasalaçaq imin töbäk süriyäle sıyınuçılarnıñ illärenä kire qaytuın täêmin itäçäk. “Solıx çişmäse” xäräkäte belän Süriyäneñ cir bötenlegen saqlayaçaq, barlıq region xalqın terrorçılıqnıñ tırnağınnan qotqaraçaqbız,”-di ilbaşı.

Ärdoğan xäräkättä qatnaşuçı kaharman törek xärbilärenä häm cirle yärdämçelärgä uñışlar teläde.

İlbaşı xäräkätneñ başlanuın beldergängä qadär Şanlıurfanıñ Cäylanpınar rayonı qarşısındağı Rasulyannan tötennär kütärelüe häm şartlaw tawışlarınıñ kilüe turında xäbärlär buldı.

“Solıx çişmäse” xäräkäte qısalarında Tel Abyadtağı terrorçılıq maqsatları gawbiśa belän utqa totıla. Süriyä çigendä xärbi oçqıçlar kürenä.

Milli saqlanu ministrlığı da internet säxifäse aşa xäräkätneñ başlanuın belderep bolay dide: “Çiklärebezneñ iminlegen täêmin itü, yänäşäbezdä terrorçı koridorınıñ tözelüenä kirtä bulu, DEAŞ häm PKK/KCK/PYD-YPGdan başlap milli iminlegebezgä yanawçı terrorçı oyışmaların täêsirsez xälgä kiterü, yäşägän cirlärennän quılğan süriyälelärneñ öylärenä häm cirlärenä kire qaytuları öçen uñaylı şartlar tudıru maqsatı belän “Solıx çişmäse” xäräkäte 16 säğat’tä tormışqa aşırıla başladı”.

Törkiyä tışqı êşlär ministrlığınnan xäräkät belän bäyle belderüdä BMO iminlek şurasına kerüçe däwlätlärneñ ilçelären cıyuları äytelä. Alarğa xäräkät belän bäyle mäğ’lümat citkereläçäk.  Älege däwlätlär AQŞ, Rusiyä, Qıtay, Angliyä häm Franśiyä.