Texnofest başlandı

Törkiyäneñ iñ zur texnologiyä çarası Texnofest İstanbul bügen başlana. Bu älege aviaśyä, ğaläm häm texnologiyä festivaleneñ ikençe tapqır uzuı. Ul 22nçe sentyabr’gä qadär Atatörek aêroportında ütäçäk.

Festival’neñ in ähämiyätle öleşe bulğan yarışlarnıñ finalınnan soñ yuğarı ball cıyuçılar büläklär alaçaq. Bıyıl anıñ öçen tulayım 3 million lira bülengän.

“Texnofest İstanbul”da 19 törle yarış ütäçäk. Şularnıñ qayberläre: keşelek faydasına texnologiyä, yasalma aqıl, keşesez su astı sistemaları, oçuçı maşina proyektı. Älege yarışlarda qatnaşırğa 122 däwlättän 17 meñ 373 komanda häm 50 meñ keşe teläk belderde.

Festival’dä öyrätüçe häm küñel açuçı master-klasslar bula. “Ğaläm apparatları - tarixqa qadärge çornıñ êzläre”, “Raketamnı yasıym”, “Räsemle qanatlar”, “Aviaśiyä häm ğaläm”, “Nanotexnologiyä” häm başqa bik küp temalar buyınça qızıqlı däreslär alırğa mömkinlek bar.  

“World Dron Kap” qısalarında suğışuçı keşesez hawa apparatı kürgäzmä oçışları ütäçäk.

Festival’dä, monnan tış, Solo Türk, Türk yoldızları, Rusiyädän Su-30, Su-35, MC-21 yulçı häm yanğın sünderü oçqıçlarınıñ tamaşası kötelä.