Törek uquçıları Rusiyägä kitä

Märsindäge Aqqoyı atom-töş stanśiyäsendä êşläyäçäk 22 törek studentı Rusiyägä uqırğa kitä. Bulaçaq aspirantlarnı Sankt-Peterburgta belem alu kötä.

Yulğa quzğalğançı alarnı ênergetika häm tabiğıy baylıqlar ministrı Fatix Dönmäz qabul itte. Räsmi zat oçraşuda uzğan yıl Aqqoyı AÊSına nigez salu belän ähämiyätle borılış yasaluın söyläde. Ul atom-töş ênergetikasınıñ êlektr yasap çığaruda ğına tügel, sälamätlek saqlawdan êlemtägä qadär bik küp mäydanda aldınğı texnologiyäneñ nigeze bulaçağın belderde.  

Ministr Törkiyäneñ älegä qadär êlektr citeşterüdä 40-50% tışqa bäyle buluın häm här yıl ênergetika çığanaqları öçen urtaça 40 milliard dollar tüläwen citkerde. AÊS isä bu bäylelektän qotqaruda ähämiyätle rol’ uynayaçaq ob’yekt.   

Bügengä qadär Törkiyä törle yıllarda 244 uquçını Rusiyädäge atom-töş tikşerenüläre universitetına injenerlıq buyınça belem alırğa cibärde. Bıyıl täwge tapqır 13e cılıtu ênergetikası, 9ı êlektr ênergiyäse buyınça uqırğa kitä. Alar Sankt-Peterburg politexnika universitetında aspiranturada belemnären kütäräçäk. Kaytuğa belgeçlärne Aqqoyı AÊSında êş kötä.