Pentagon Törkiyä belän bergä xäräkät itäçägen belderde

AQŞ saqlanu ministrlığı Törkiyä belän “Berdäm xäräkät üzäge” tözü mäs’äläsendä kileşülären häm prośessnıñ êtaplap tormışqa aşırılacağın belderde. Süriyäneñ tön’yağında bulaçaq cirlek turında Pentagon süzçese Şon Robertson söyläde. Anıñ belderüendä “imin töbäk” bilgelämäsen qullanmawı iğ’tibarnı cälep itä.

Robertson bolay di: “Änkarada bu atnada bulğan oçraşularda Süriyäneñ tön’yaq-könçığışında NATO berlektäşebez Törkiyäneñ xaqlı qurqınıçsızlıq borçılularına cawap birerlek däwamlı iminlek mexanizmı tözelüdä alğarış buldı.  Bu nisbättän planlaştıru häm tormışqa aşırunı däwam itü öçen “AQŞ-Törkiyä berdäm xäräkät üzäge” qorırğa uylıybız. AQŞ qayber adımnarnı xäzer ük yasarğa xäzerlänä häm bu mäs’älälärne Törkiyä belän söyläşüne däwam itä”.  

Törkiyä milli saqlanu ministrlığında AQŞ xärbiläre belän söyläşülär 5nçe-7nçe avgustta uzdı. Anda imin töbäkneñ tınıçlıq koridorı wazıyfasın da başqaraçağı häm cirlärennän kitärgä mäcbür bulğan süriyälelärneñ tuğan tufraqlarına isän-imin qaytuları öçen här östämä çaranıñ küreläçäge turında da kileştelär.