"Törkiyä Qırımnıñ qanunsız basıp alınuın tanımadı häm tanımayaçaq"

Törkiyä Qırımnıñ qanunsız basıp alınuın tanımadı häm tanımayaçaq. İlbaşı Räcäp Tayyip Ärdoğan Ukraina däwlät başlığı Vladimir Zelenskiy belän urtaq matbuğat cıyılışında şulay dip belderde. Änkarağa kilgän räsmi qunaqnı ul üzeneñ rezidenśiyäsendä qabul itte.

Ärdoğan, jurnalistlar qarşında çığış yasap, Qırım mäs’äläsenä ayırım tuqtaldı.

“Qardäş xalıqnıñ tarixi watanı Qırımdağı yäşäyeşläreneñ däwam itüe, milli kemlekläreneñ häm mädäniyätläreneñ saqlanışı, töp xoquq häm irekläreneñ saq astına alınuı berençel burıçıbız bularaq qala,”-dide ul.

Qunaqqa kilgän däwlät başlığı Zelenskiy isä Ärdoğanğa Qırım mäs’äläsendäge säyäsäte öçen räxmäten citkerde. Törkiyäne ul äybät kürşe, samimi dus häm ähämiyätle strategik urtaq bularaq kürüen citkerde. Şulay uq, ike aradağı mönäsäbätlärgä zur ähämiyätbirüen dä äytte.

Zelenskiynıñ çığışında mondıy süzlär dä bar ide: “Törek êşmäkärlären Ukrainağa çaqıram. Tınıçlap êşli aluığızğa üz isememnän garantiyä biräm”.