"Törkiyä üz adımın ataçaq qodrätkä iyä"

AK partiyä süzçese Ömär Çälik Törkiyäneñ Süriyädä üz adımın üze yasayaçaq köçkä iyä buluın söyläde. Ul kiçä ilbaşı Räcäp Tayyip Ärdoğan citäkçelegendä partiyäneñ Üzäk başqarma komitetı cıyılışı barğanda matbuğat oçraşuı ütkärde.

Anda Ömär Çälik, sorawlarğa cawap birep, Süriyäneñ Färat yılğası könçığışında qayber däwlätlärneñ yärdäm çaralarınıñ terrorçılarğa imin cirlek bulaçaq ber töbäk oyıştıru şikelle kürenüen äytte.

“Törkiyä cäberlänüçelärne üz qanatı astına alaçaq, töbäktäge häm dön’yadağı tınıçlıqqa öleş kertäçäk imin töbäk, solıx koridorı êzläw êçendä. Milli iminlek öçen başlanğan bu prośess region häm dön’yadağı iminlek öçen dä bik ähämiyätle,”-dide ul.

Çälik beldergänçä, ilbaşı Ärdoğannıñ Färatnıñ könçığışı belän bäyle üzgäreşlärne belderüe Törkiyäneñ iminlek ixtiyacları nisbätennän adım yasaw mäs’äläsendä waqıtnıñ bik qısqaruın kürsätä. “Törkiyä monda yä dialog belän, yä diplomatiyäneñ yomşaq köç êlementları, kiräk bulsa basım yasawçı diplomatiyä yärdämendä,  ber dä bulmasa faktik quät qullanıp üz milli iminlegen saqlawda qararlı buluın açıq räweştä belderäçäk,”-dip söyläde ul.

Çälik Törkiyäneñ berlektäşlärennän bik uñay poziśiyä kötüen belderde. “Asılında NATO qısalarındağı berlektäşlärebez iminlekneñ bülenmäslek prınśibına tayana. Monda ittifaq’ yärdämläşüe nigezder, ğadel räweştä yanawnı urtaqlaşu kiräk,”-di ul. Çälik dön’yanıñ başqa cirlärendä başqa däwlätlärgä turıdan-turı yanağan xäweflär turında süz barğanda, NATO yärdämläşüen assızıqlawçılarnıñ êş Törkiyägä kilgändä ittifaq’ ruxına qarşı xäräkät itüen söyläde.

“Kön’yaq çigebezdäge terrorçılıq töbäge yasaw çaralarına qarşı berlektäşlärebez belän berlektä Törkiyäneñ kontrolendä solıx koridorı, iminlek töbäge tözergä telibez, ägär bu bulmasa, Törkiyäneñ qarşında daimi ozaytular, çitkä yünälderülär, ilneñ milli iminlek mäs’äläläre öçen alınırğa tiyeşle ixtiyaclarına qarşı çığular bulıp torsa, Törkiyä monda, hiçşiksez, üz adımın üze yasayaçaq qodrätkä, quätkä iyä,”-dide AK partiyä süzçese Ömär Çälik.