Ärdoğan Yaponiyä imperatorı belän küreşte

İlbaşı Räcäp Tayyip Ärdoğan Törkiyä belän Yaponiya arasında ber yarım ğasırğa yaqın däwam itüçe duslıq bäyläneşläreneñ tağın da köçäyüen söyläde.

G20 sammitında qatnaşu öçen Yaponiyägä kitkän cirennän ul törle oçraşular oyıştırdı. Şulardan berse - Yaponiyä imperatorı Naruxito belän İmperatorlıq sarayında küreşü. Oçraşuda Äminä xanım da qatnaştı.

Ärdoğan Yaponiyä xökümäte räise Şinzo Abe belän dä êşlekle aş mäclesendä küreşte. Törkiyä liderı, oçraşunıñ jurnalistlar öçen açıq öleşendä çığış yasap, Yaponiyägä kilüenä bik qanäğat’ buluın belderde. Ul qunaqçıllığı öçen Abeğa räxmäten citkerde häm Osakada G20 liderlar sammitınıñ uñışlı ütüe öçen qotlaw süzlären äytte.  

Xökümät räise Abe isä Törkiyä belän Yaponiyä arasındağı strategik urtaqlıqnı tağın da yuğarı däräcägä çığarırğa tırışaçaqların söyläde.

Ärdoğan ilneñ liberal demokrat partiyäse ğomum särqatibe häm Yaponiyä-Törkiyä parlamentlarara duslıq törkeme räise Toşixiro Nikainıñ xörmätenä oyıştırılğan töşke aşta da qatnaştı. Anda ul säfäreneñ iskitkeç näticäle häm uñışlı ütüen assızıqladı. Törkiyä ilbaşı barı tik säyäsi häm iq’tisadi mäydanda tügel, mädäni-fänni tarmaqlarda da ike il arasında citdi mömkinleklär buluına ışanuın belderde. “Älbättä Yaponiyä belän arabızdağı iñ ähämiyätle proyektlardan berse - İstanbulda tözelergä tiyeşle Törek-Yapon fän häm texnologiyä universitetı. Anıñ tiz arada êşli başlawı öçen tırışlıq quyabız,”-dip söyläde Ärdoğan. Ul, şulay uq, 2019nçı yılnı Yaponiyädä törek mädäniyäte yılı iğ’lan itülären dä xäterlätte. “Yıl buyı oyıştırılaçaq programmalarıbız belän Törkiyäneñ bay mädäni tuplanışın yapon duslarıbızğa yaqınnan tanıtırğa maqsat itep quyabız,”-dide ul.  

“Xäzinälär häm Ğosmanlı imperatorlığında lalä tradiśiyäse” dip isemlängän Topkapı sarayı kürgäzmäse Tokioda zur qızıqsınu uyatqan. Êkspoziśiyägä 170 meñ sänğat’ söyüçe kilgän. Ärdoğan monıñ törek mädäniyäte belän qızıqsınunıñ kürsätkeçe buluın söyläde. Ul Tofukudzi xramında açılğan legendar fotorässam Ara Gülär kürgäzmäseneñ dä şundıy uq qızıqsınu tudıraçağına ışanuın äytep uzdı.