Törkiyä yaman şeş däwalaw täcribäsen öyränä

Törkiyä sälamätlek saqlaw ministrlığı Kuba belän bergä yaman şeştän vakśina häm darular çığaruda xezmättäşlek itäçäk. Monıñ qısalarında Kubadan yuğarı däräcäle delegaśiyä bu atnada Törkiyägä kiläçäk.  

Törkiyä sälamätlek saqlaw ministrı Fäxrettin Koca kubalı wazıyfadaşı Xose Angel Portal Miranda belän Şveśiyäneñ Jeneva şähärendä küreşep älege mäs’älä xaqında söyläşte. Alar Bötendön’ya sälamätlek saqlaw assambleyasında qatnaşu öçen kitkän ide.

İke ministr oçraşuda infekśiyälär häm yaman şeşkä qarşı vakśinalar, darular xaqında fiker alıştı. Törkiyä alarnı onkologiyä çirlären däwalawda ähämiyätle täcribägä iyä Kuba belän bergä çığarırğa teläwen citkerde.

Sälamätlek saqlaw ministrı Fäxrettin Koca maqsatnıñ daru, vakśina, qan êşlänmäläte, mediśina cihazlarında üz-üzen täêmin itä aluçı däwlät xälenä kilü buluın da äytte. “Tağın ber maqsatıbız dön’yaküläm bazarda köndäşlek itä aluçı citeşterü däräcäsenä menü,”-dide ul.

Bötendön’ya sälamätlek saqlaw assambleyasında, monnan tış, İndoneziya häm Qırğızstan belän dä xezmättäşlek kileşüläre tözelde.