Saylaw näticäläre

Törkiyädä kiçä ütkän muniśipal’ saylawlarda partiyälärneñ üz aralarında tözelgän ittifaqları alğı planğa çıqtı. İl külämendä ciñüçe Cömhur ittifağı buldı. AK partiyä häm Millätçe xäräkät firqasennän toruçı älege berlek 51,74 % tawışnı cıydı.

İkençe urında Cömhüriyät xalıq partiyäse häm Yaxşı partiyädän toruçı Millät ittifağı. Alarğa il külämendä saylawçılarnıñ 37,64%ı ışanıçın kürsätte.  

Tawışlarnı muniśipalitetlarğa bülep qarağanda sannar bolayraq: barlıq cirle xakimiyätlärneñ 44,42%ın AK partiyä aldı, 30,7%ı - Cömhüriyät xalıq partiyäsendä, 7,46%ı - Yaxşı partiyägä kitte, 7,25% tawış Millätçe xalıq partiyäseneke. Xalıqlarnıñ demokratik partiyäse 4,2% tawışqa iyä buldı. Qalğan firqalär isä 6,60% tawış aldı

AK partiyä - 796, CXP - 246, MXP - 227, XDP -69 häm Yaxşı partiyä 21 muniśipalitetta cñü yawladı.

Tulı bulmağan mäğ’lümatlarğa qarağanda, 3 zur şähärdä näticälär bolay. Yuğarı saylaw komissiyäse räise Sadi Güvän beldergänçä, İstanbulda Millät ittifağı namzäte Äkräm İmamoğlu 4 million 159 meñ 650 keşeneñ tawışın alğan. Cömhür ittifağınnan kürsätelgän kandidat Binali Yıldırım öçen 4 million 131 meñ 761 saylawçı tawış birgän. Bu sistemağa kergän sannar. Xäzergä 31 meñ 102 ärcä açılğan häm tulısınça xisaplanğan. 84 ärcä buyınça bäxäslär däwam itä. Alar älegä sistemağa kertelmägän.

Änkarada Cömhür ittifağı 47,20% tawışnı aldı, Millät ittifağı - 50,62%.

İzmirdä Cömhür ittifağına saylawçılarnıñ 38,49%ı ışanıç kürsätte, Millät ittifağına - 58,06%ı.