Törkiyä Franśiyägä baruçılarnı kisätä

Törkiyä Franśiyägä säyäxät turında kisätü çığardı. Tışqı êşlär ministrlığınnan yasalğan belderüdä älege ilgä baruçı töreklärne Parijda häm başqa şähärlärdä demonstraśiyä mäydannarınnan yıraq torırğa, magistral’ häm şähärlär arası yullarda iğ’tibarlı bulırğa çaqırdılar. Anda Franśiyädäge iq’tisadi şartlarğa rizasızlıq kürsätü maqsatı belän başlanğan “sarı jiletlılar” dip ataluçı massaküläm xäräkätneñ ildä uram çaraları oyıştıruı xäterlätelä.

“Soñğı tapqır 1nçe dekabr’ könne Parijda şähärneñ iñ xäräkätle uramnarında yöreş, barrikadalar qoru, maşinalarnı yandıru häm iminlek xezmätläre belän bäreleş buldı. Rizasızlıq çaraları öçençe atnasına kerde. Anda xäzergä qadär 2 keşeneñ ğomere özelde, 850dän artığı yaralandı,”-diyelä belderüdä.  

Uram çaraları 17nçe noyabr’dä başlanğan ide. Ul köçen arttırıp däwam itü säbäple tışqı êşlär ministrlığı Franśiyägä baruçı yäki anda yäşäwçe Törkiyä watandaşların kisätüne kiräk dip taptı. Alarnı waqıyğalarnı küzätep barırğa, Törkiyäneñ Parijdağı ilçelege häm başqa şähärlärdäge konsullıqları tarafınnan yasalaçaq belderülärgä qolaq salırğa çaqırdılar.