Çavuşoğlu yuqqa çıqqan jurnalist turında belderü yasadı

Törkiyä tışqı êşlär ministrı Mäwlet Çavuşoğlu jurnalist Cämal Qaşıqçınıñ êşe buyınça qulğa töşerelgän barlıq dälillär tulayım açıqlanğannan soñ böten dön’ya belän urtaqlaşaçaqların belderde. Bu xaqta ul räsmi säfär belän Albaniyädä waqıtta matbuğat wäkillärenä söyläde. Mäwlet Çavuşoğlu tikşerü belän bäyle bernärsäne dä yäşerep qalmayaçaqların äytte. “Törkiyäneñ AQŞ däwlät särqatibe Mayk Pompeo yäisä başqa ber amerikalı wäkilgä yazdırıp alınğan tawışlarnı birüe döreslekkä turı kilmi,”-dide ul. Ministr moña qadär ber il belän dä dälillärne urtaqlaşmawların assızıqladı.  

Soğud Ğaräbstanı jurnalistı Cämal Qaşıqçı 2nçe oktyabr’ könne räsmi êşlär öçen üz ileneñ İstanbuldağı konsullığına kerde häm şunnan soñ xäbärsez yuğaldı. Ul ğaräp reformaçılarınıñ platforması sanaluçı “Al Watan” gazetına öleş kertkän şäxes. Şulay uq, jurnalist Amerikanın “Vaşington Post” gazetı öçen mäqalälär yaza ide.

Qaşıqçınıñ yuğaluınnan soñ Törkiyä häm Soğud Ğaräbstanı urtaq tikşerü törkeme oyıştırdı. Alar 15nçe-16nçı oktyabr’dä konsullıq binasında, 17sendä konsulnıñ yortında tentü yasadı.