Çavuşoğlu Singapurda ike yaqlı oçraşular ütkärä

Çavuşoğlu Singapurda oyıştırılğan ASEAN Kön’yaq-könçığış Aziya xalıqara berlegeneñ 51nçe Tışqı êşlär ministrları cıyılışı qısalarında ike yaqlı oçraşular ütkärä.

Çavuşoğlu iñ êlek Yaponiya Tışqı êşlär ministrı Taro Kono belän oçraştı.

Oçraşu waqıtında Çavuşoğlu häm Kono ike yaqlı xezmättäşlekne, Sinop atom-töş stanśiyäse proyektın häm Törek-yapon belem häm texnologiya universitetınıñ iñ qısqa waqıtta açıluı belän bäyle bularaq yasalaçaq adımnarnı söyläşte.

Çavuşoğlu häm yapon xezmättäşe ayıruça Süriyä häm Ğıyraq belän bergä regional’ mäs’älälärne dä quzğattı.

Ministr Çavuşoğlu oçraşu belän bäyle bularaq “Twitter”dağı xisabınnan: "Törkiyä-Yaponiya xezmättäşlegendä şaqtıy ölkädä möhim tizlekkä ireştek. Bu tizlekne ike yaqlı yuğarı däräcäle säfärlär belän däwam itterergä telibez. Tışqı êşlär ministrı Taro Kono belän Singapurda oçraşuıbızda ike yaqlı mäs’älälärne häm regional’ täräqqıyät’lärgä bäyä birdek”, - dip yazıp çıqtı.

Mäwlüt Çavuşoğlu soñınnan İran Tışqı êşlär ministrı Cävad Zarif belän küreşep söyläşte.

Diplomatik çığanaqlar Çavuşoğlu häm Zarifneñ oçraşu waqıtında ike yaqlı häm regional’ mäs’älälärdä fikerläre belän almaşuın belderde.

Mäwlüt Çavuşoğlu İndoneziya Tışqı êşlär ministrı Retno Marsudi, V’etnam baş ministr urınbasarı häm Tışqı êşlär ministrı Phan Binh Minh belän dä ayırım ayırım oçraştı.