Germaniyada Özilgä teläktäşlek çarası

Germaniya başqalası Berlinda ıruğçı häm diskriminaśiyäçel höcümnär näticäsendä ilneñ cıyılma komandasınnan kitkän Mäsüt Özilgä teläktäşlek çarası oyıştırıldı. Anı Xacivat sänğat’ häm mädäniyät cämğıyäte başlap yörde. “Min Özil” dip isemlängän çara Aksel Springer näşriyatınıñ qarşında uzdı. Anda ilbaşı Räcäp Tayyip Ärdoğan häm Mäsüt Özil isemenä şiğar’lär äytelde. Qatnaşuçılar Germaniya matbuğatı, ayıruça, Bild gazetasınıñ Ärdoğan häm Özilgä qarşı provokaśiyäle xäbärlärenä rizasızlıq belderde.

Çarada qatnaşuçılarnıñ qayberläre “Min Özil” yazulı futbolka kigän, kübese östenä futbolçınıñ fotosın yabıştırğan. Oyıştıruçılardan berse Bilgili Ürtmän üz çığışında Germaniyadağı möselmannar häm töreklärneñ “ildäge ğomumi qaraşqa turı kilmäwçe” säyäsi fiker yörtkändä ikençe häm öçençe sıynıf keşe bularaq kürelüen belderde. Ul nemeś matbuğatınıñ provokaśiyälären assızıqlap, Mäsüt Özilneñ ilbaşı Ärdoğan belän töşkän fotosı tänqıyt’länüen äytte. Şul uq waqıtta, Ürtmän söyläwençä, alman jurnalistları törek çığışlı qayber säyäsätçelärneñ PKK terrorçı oyışması bayraqları yanında yasalğan çığışlarına tel-teş tidermi.  

Berlinda yäşäwçe 31 yäş’lek İlxan Altun isä Mäsüt Özil belän bulğan xälneñ berdänber oçraq tügellegen, barısınıñ da universitet, êş cire häm başqa urınnarda ıruğçılıq belän oçraşuın belderde.  

Törek çığışlı Germaniya futbolçıları Mäsüt Özil, İlkay Gündoğan häm Angliya prem’yer - ligasında uynawçı Cänk Tosun may ayında Londonda ilbaşı Ärdoğan belän oçraşıp fotoğa töşkän ide. Şunnan soñ Germaniyada Özil häm Gündoğanğa qarata rasaçıl höcümnär häm tänqıyt’läw başlandı. Mäsüt Özil uzğan atnada cıyılma komandadan kitüen belderde.