Ärdoğannı qotlaw

Törkiyä ilbaşı Räcäp Tayyip Ärdoğanğa 24nçe iyün’dä uzğan saylawlarda ciñüe belän qotlawlar kilü däwam itä. Germaniya yağı ilbaşı häm xalıq ışanıçlıların saylaw näticälärenä ixtiram belän qarawların belderde. Däwlät başlığı Frank-Val’ter  Ştaynmayer häm kanśler Angela Merkel’ Ärdoğannı telefon aşa şaltıratıp qotladı. Monnan tış, tışqı êşlär ministrı Xeyko Maas ta törek xalqınıñ qararın qabul itülären häm moña xörmät belän qarawların söyläde.  

Franśiya ilbaşı Êmmanuêl’ Makron Ärdoğanğa täbrikläw xatı cibärde. Anda ul qotlawlardan tış, ike il arasındağı mäs’älälärgä dä qağıla. Makron terrorçılıqqa qarşı köräştäge xezmättäşlek häm başqa xalıqara mäs’älälär buyınça bäyläneşlärne däwam itärgä çaqıra. Franśiya ilbaşı tizdän küreşü telägen dä belderä.

Soğud Ğaräbstanı täxet varisı prinś Möxämmät bin Sälman da ilbaşı Räcäp Tayyip Ärdoğannı täbrik itte. “Törkiyä cömhüriyäte başlığına sälamätlek häm bäxet, qardäş törek xalqına isä tağın da alğa kiteş häm üseş telim,”-di prinś.

Angliya prem’yer-ministrı Tereza Mêy häm Greśiya xökümäte başlığı Aleksis Çipraş ta Ärdoğanğa telefonnan şaltıratıp saylawda ciñüe belän qotladı.