Binali Yıldırımnıñ AQŞqa cawabı

Prem’yer-ministr Binali Yıldırım AQŞnıñ Törkiyägä qoral satunı tuqtatuınıñ strategik urtaqlıq ruxına qarşı buluın belderde.

AQŞ senatı Pentagonğa 2019nçı finans yılı öçen 716 milliard dollarlıq byudjet ayırunı küzdä totqan qanun proyıktın 10 qarşı, 85 uñay tawış belän qabul itte.  

Dokumentnıñ Törkiyä belän bäyle bülemendä isä “Änkaranıñ Rusiyädän S-400 hawa saqlanu sistemaları aluınıñ ike il arasındağı kiyerenkelekne arttıruı” häm “2016nçı yılnın 15nçe iyülendä Fätxullaxçı terror oyışması FETÖnıñ xıyänätçel tüntäreleşkä kereşüendä oyışma belän bäyläneşe açıqlanğan Amerikalı din ähele Êndryu Bransonnı irekkä çığaru kiräklege” äytelä.

Proyıktta Törkiyäneñ Rusiyädän S-400lärne aluınıñ AQŞ belän Törkiyä arasındağı urtaq qoral sistemaların êşläwgä naçar täêsir itüe alğa sörelde.

Dokumentta, kürsätelgän säbäplär näticäsendä, F-35, F-16 oçqıçları, Patriot hawa saqlanu sistemaları, awır yök taşu boralağı, AH-1, H-60 tibındağı boralaqlarnı Törkiyägä satunı tuqtatıp toru kiräklegen assızıqlağan bülem dä bar.    

AQŞnıñ qararına xökümät räise Binali Yıldırım cawap birde. “Törkiyä al’ternativasız tügel. Üz çaralarıbıznı küräbez. Saqlanu sänäğatendä millilek häm cirlelekne arttırdıq. Êmbargo - saqlanuda yomşaruğa säbäp bulmas,”-dide ul.