Bötendön’ya sälamätlek assambleyası

Törkiyä sälamätlek tarmağındağı täcribasen dön’ya belän urtaqlaşırğa äzer. Bu xaqta sälamätlek saqlaw ministrı urınbasarı Äyüp Gümüş belderde. Ul Berläşkän millätlär oyışmasınıñ Jenevadağı ofisında baruçı 17nçe Bötendön’ya sälamätlek assambleyasında çığış yasadı. Äyüp Gümüş Törkiyäneñ 2002nçe yıldan başlap sawlıq sistemasında uñışlı yañartular alıp baruın assızıqladı häm bu reforma qısalarında alınğan täcribäne başqa ölkälär belän urtaqlaşırğa äzer buluların belderde. Ul ildä xalıqnıñ 98%ınıñ ğomum sawlıq iminiyäte buluın telgä aldı. Monnan tış, sälamätlek saqlawdağı zur çığımnar belän köräşü yullarına basım yasaldı. Mäsälän, yaman şeştäge şikelle qıymmätkä töşä torğan däwalawlarnı däwlät tulısınça üz östenä aldı.

Ministr urınbasarı çığışında Gazzädäge wäzğıyät’kä dä iğ’tibar yünältte. Ul İzrail’ höcümnärendä yaralanğan 3 meñ keşegä aşığıç räweştä daru, mediśina cihazları häm urın-cir kiräk buluın, bolarnı iltüdä qıyınlıqlar tuuın söyläde. Törkiyä yaralılarnı Gazzädän çığaru häm darular kertü öçen böten tırışlığın birä, ämma İzrail’ häm qayber kürşe illär moña kirtä quya. Gümüş Bötendön’ya sälamätlek saqlaw oyışması häm başqa BMO tarmaqların, xalıqara cämäğat’çelekne bu wäzğıyät’kä däşmiçä qalmasqa, kiräkle adımnarnı yasarğa çaqırdı.  

“Törkiyä Fälästin xalqına yärdämen hiçşiksez däwam itäçäk,”-dide ul.

71nçe Bötendön’ya sälamätlek assambleyasında 194 äğ’za ildän 4 meñgä yaqın delegat qatnaştı. Çara 26nçı mayğa qadär däwam itäçäk.