Törkiyä – Rusiyä – İran sammitı

Süriyä mäs’äläsenä bağışlanğan Törkiyä – Rusiyä – İran sammitı başqala Änkarada ütä. Anda Törkiyä ilbaşı Räcäp Tayyip Ärdoğan, Rusiyä däwlät başlığı Vladimir Putin, İran liderı Xäsän Ruxani qatnaşa. Çara İlbaşı idaräse kölliyätendä uza. Diplomatik çığanaqlardan alınğan mäğ’lümatlarğa qarağanda, yuğarı däräcädäge däwlät xezmätkärläre kiçä bergäläşep sammit axırında iğ’lan itergä planlaştırılğan urtaq deklaraśiyäne xäzerlägän. Anda Süriyädäge “utnı tuqtatu” qararın däwam itü häm anı bozu oçraqların buldırmaw, Süriyäneñ cir bötenlegen saqlaw şikelle êlekkege deklaraśiyälärdä dä urın alğan mäs’älälärgä basım yasaluı kötelä.

Nindi yaña adımnar atılacağı xaqında da yuğarı däräcädä uzğan cıyılışta alınğan täq’dimnär bügen öç däwlätneñ tışqı êşlär ministrları oçraşuında urtağa quyıldı. Bu täq’dimnär bügen Mäwlet Çavuşoğlu, Sergey Lavrov häm Cävad Zarif tarafınnan irtänge aş waqıtında da qaraldı. Alar qulınnan uzğan deklaraśiya proyıktı liderlar tarafınnan da raslanır dip kötelä.

“Törkiyä - Rusiyä – İran öçyaqlı sammitın” qabul itüçe ilbaşı Ärdoğan Ruxani häm Putin belän matbuğat konferenśiyäse ütkäräçäk.  “Süriyä” temalı Ärdoğan, Putin häm Ruhani qatnaşındağı öçyaqlı sammit uzğan yılnıñ 22nçe noyabrendä Rusiyäneñ Soçi şähärendä dä uzğan ide.

Änkaradağı sammit qısalarında liderlar ikeyaqlı söyläşülär dä ütkärde.