Vöcdan konvoyı yulğa çığa

Bügen Xalıqara Vöcdan konvoyı İstanbuldan Xatayğa taba yulğa çığa. Maqsatları - Süriyädä 7 yıl baruçı suğışta totqınlıqqa êläkkän, ğazaplawlar häm naçar mönäsäbät kürgän xatınnarğa iğ’tibar yünältü häm bäysezleklären taläp itü. Bu konvoy törek xatın-qızları tarafınnan oyıştırılğan. Anda 55 ölkädän – törle din, tel, rasa häm mädäniyättän meñnärçä wäkil qatnaşa. Arada akademik, xoquq belgeçe, jurnalist, yazuçı, tabib, sänğat’çe, sportçı, säyäsätçe, xucabikä häm başqalar bar. Mäsälän, Paqıstannan deputat Munaza Xasan, Ukrainadan deputat häm tabib Ol’ga Bogomoleś, Şotlandiyadan yazuçı, jurnalist häm xatın-qız xaqları öçen köräşüçe İvonna Ridley, Angliyadan N’yukastl parlament äğ’zası Ênn Şofild, Katar ämire ğailäsennän Äsiyä Waxid Alrabaya, Malay üniversitetı xoquq fakul’tetınnan professor Dato Sri, Bosniyadan Srebreniśe äniläre.

Konvoyğa İstanbul häm Anadolunıñ küpsanlı töbäklärennän xatın-qızlarnı yörtüçe 200gä yaqın avtobus häm maşinalar iyäräçäk. Kocaäli, Sakarya, Änkara häm Adanada tuqtalışlar bulaçaq.  8nçe martta isä Xatayda jurnalistlar qarşında çığış yasarğa cıyınalar. Meñnärçä xatın-qız Süriyädä Äsäd rejimı törmälärenä xaqsız räweştä yabılğan häm här kön zolım kürüçe xatın-qızlarnı irekkä cibärergä çaqıraçaq.