İstanbulda yaña yıl kiçäsendä höcüm

İstanbulnıñ Ortaköy bistäsendä tönge klubta oyıştırılğan qorallı terror höcümendä ber poliśiya xezmätkäre belän bergä 39 keşeneñ ğomere özelgän, 65 keşe dä yaralanğan.

Höcümne qış babay qıyäfätle keşeneñ yasawı belderelä.

Terrorçınıñ höcümnän soñ qıyäfäten almaştırıp xalıq arasına kerep qaçuı isäplänelä.

İstanbul vilayät başlığı (gubernator) Vasip Şahin höcüm belän bäyle bularaq yasağan berençe belderüendä ber terrorçınıñ ozın köpşäle qoral belän başta işek yanında torğan poliśiya xezmätkären häm ber watandaşnı şähit itüen häm annan soñ êçkä kerep yaña yıl qotlarğa häm küñel açarğa dip kilgän gäyepsez keşelärgä bik wäxşilärçä, ayawsız räweştä ut açuın äytte.

Êçke eşlär ministrı Söläyman Soylu da höcümne yasağan terrorçını totqarlaw çaralarınıñ alıp barıluın belderde.

Häläq buluçılardan 20seneñ tanıqlığınıñ bilgelänelüen, bolardan 15eneñ çit il keşese buluın äytüçe Soylu tanıqlıq bilgeläw êşçänlegeneñ däwam itüen assızıqladı.

Sälamätlek saqlaw ministrı Räcäp Akdağ da Êçke êşlär ministrı belän bergä xastaxanägä yaralanuçılar yanına barıp, yaralanğan 65 keşedän dürteseneñ xäleneñ awır buluın belderde.

Akdağ yaralanuçılar arasında küp sanda çit il keşeseneñ buluı mäğlümaten citkerde.

İlbaşı Räcäp Tayyip Ärdoğan da terror höcümennän soñ bäyläneşle räsmilärdän mäğlümat aldı.

Ärdoğan Premyer-ministr Binali Yıldırım, İstanbul vilayät başlığı Vasip Şahin häm İstanbul cömhüriyät baş prokurorı İrfan Fidan belän telefon söyläşülären ütkärde.

Waqiğadan bik köyeneçle buluın äytüçe İlbaşı Ärdoğan, täräqqiyätlärne yaqınnan küzätep, häläq buluçılar häm yaralanuçılarnıñ wazğiyäte turında da mäğlümat aldı.