Qaharmannar belän oçraşu
Binali Yıldırım tüntäreleşkä qarşı çıqqan watandaşlarnı qabul itte
Törkiyä premyer-ministrı Binali Yıldırım tüntäreleş kereşüenä qarşı çıqqan watandaşlarnıñ tarixka kerep qaluın belderde.
Yıldırım Fätullahçı terror oyışması/parallel’ däwlät qorılışınıñ tüntäreleş kereşüendä üzlären uylap tormıyça uramğa çıqqan häm tüntäreleşkä qarşı kilgän watandaşlarnı Änkarada Çankaya sarayında qabul itte.
Yıldırım İstanbulda Malatya bistäsendä tüntäreleşçelär qaldırıp kitkän tanknı qullanğan Mostafa Özbäy, İstanbuldağı Atatörek hawa mäydanında ber tank aldına yatqan Mätin Doğan, tüntäreleş kereşüenä qarşı yök maşinası belän Taksim mäydanına çıqqan Şärifä Boz, tormış iptäşe Şänol Boz häm kürşese Gülsähär Yüksäl belän oçraştı.
Törek milläteneñ tüntäreleş kereşüe tönendä dastan yazuın, ul tönne härber watandaşnıñ berär qaharman buluın assızıqlağan Yıldırım: “Qaharmannarıbız belän oçraşudan bik şatmın. Sez isemegezne tarixka altın xäreflär belän yazdırdığız. Härberegez Anadolu xatın-qızınıñ ruxın, Anadolu keşeseneñ kürkämlelegen ülemsezläşterdegez,” – dide.
Watandaşlar da ildä mondıy waqiğalarnıñ qabatlanmawın teläp, watan häm bayraq öçen härwaqıt ziräk bulaçaqların citkerde.
