Caparov blogernıñ yalğan söyläwen belderde

Qırğızstan däwlät başlığınıñ matbuğat xezmäte ilbaşı Sadir Caparovnıñ videoyullamasın çığardı. Anda räsmi zat Issıq-Küldä uran êşçänlekläre planında Rotşil’d ğailäseneñ öleşe bulu turındağı yäşeren teoriyälärneñ yalğan buluın äytä.

Qazaqstanlı blog avtorı Anastasiya Äxmätova monnan alda çığarğan ber videosında Awraziya analiz klubı citäkçese, säyäsät belgeçe Nikita Mendkoviçtan alğan mäğ’lümatqa tayanıp, Qırğızstanda uran citeşterü xoquqın alırğa teläwçeneñ Rotşil’dlarnıñ Franśiyädäge näsele buluın, älege mäs’älägä, monnan tış, Angliyä tışqı êşlär ministrlığı häm küzläw oyışmalarınıñ da qatışuın alğa sörä. Şulay uq blogernıñ süzlärenä qarağanda, älege söyläşülärdä ministrlar şurası citäkçese Aqılbäk Caparov häm urınbasarı Ädil Baysalov ta qatnaşqan.

Däwlät başlığı Sadir Caparov 5 minutlıq videosında bu söylängännärne tulısınça yalğan bularaq bäyäläde. Ul ilneñ totrıqlılığın bozarğa teläwçe tışqı köçlär barlığın äytte häm xalıqnı alarğa ışanmasqa çaqırdı.

Caparov citkergänçä, kiläçäktä bulaçaq uran citeşterü tırışlıqlarında uran barı tik 0,17% täşkil itäçäk, töp material isä - titanomagnetit bula.

“Titanomagnetit çığarsaq, uran da çistartılaçaq. Bu bezgä, kiresençä, urannan çistartu mömkinlege biräçäk. Anda rekul’tivaśiya êşçänlekläre alıp barılaçaq. Uran citeşterü bulmayaçaq. Monı êlek tä söylädem, xäzer qabatlap äytäm”,-dide Caparov.  Ul ildä iq’tisadqa fayda kiteräçäk proyektlar başlanuğa, kisäk kenä tışqı köçlärneñ päyda buluın assızıqlıy. İlbaşı 2019nçı yılda At-Başida bulğan waqıyğanı misalğa kiterde. İnvestorlar anda 280 million dollarlıq kertem belän logistika üzäge tözergä planlaştıra, tik, Caparov äytüençä, Äxmätova şikelle keşelär töbäk xalqına yalğış mäğ’lümat birde häm alar proyektqa qarşı çıqtı.  

“Häm xäzer dä şundıy uq oçraq. Şuña kürä, qaderle watandaşlarım, sezdän aqnı - qaradan, dusnı - doşmannan ayıruığıznı sorıym. Bügen internettağı här mäğ’lümatnıñ kontrol’ itelüe ähämiyätle. Tışqı doşmannarnıñ süzlärenä ışanmağız, üzegezne aldawğa yul quymağız”,-dide Qırğızstan däwlät başlığı Sadir Caparov.