Törki däwlätlär oyışmasınıñ awıl xucalığı ministrları cıyıldı

Qazaqstan awıl xucalığı ministrı Aydarbäk Saparovnıñ qabul itüendä oyıştırılğan cıyılışta Azärbaycan awıl xucalığı ministrı Mäcnun Mämmädov, Üzbäkstan awıl xucalığı ministrı İbrahim Abdurahmonov, Qırğızstan awıl xucalığı ministrı berençe urınbasarı Kubat Kaseyinov häm Törkiyä awıl häm urman xucalığı ministrı urınbasarı Äbubäkir Gizligidär belän Törki däwlätlär oyışması ğomum särqatibe Kubanıçbäk Ömüraliyev qatnaştı.

Saparov cıyılış açılışında yasağan çığışında Qazaqstannıñ tuplam säwdä äyläneşeneñ 28%ınıñ Törki däwlätlär oyışmasına äğ’za däwlätlärneke buluın belderep: "Qazaqstan kötülek mäydanı yağınnan dönyanıñ 5nçe ile. Terlekçelek bezneñ öçen häm tradiśion häm dä perspektivalı tarmaq. Şuña kürä terlekçelek êşlänmäläreneñ satıluına prioritet biräbez. Bu qısada Qazaqstannıñ Üzbäkstan, Törkiyä, Törekmänstan häm Vengriyä (Macarstan) bazarlarına yuğarı sıyfatlı it produktları belän täêmin itärgä äzer buluın belderergä telim”, - dip äytte.

Törki däwlätlär oyışması ğomum särqatibe Ömüraliyev tä cıyılışnıñ awıl xucalığı tarmağında äğ’za illär arasında xezmättäşlekneñ nığıtıluı belän bergä törki xalıqlarğa totrıqlı häm ışanıçlı azıq-tölek belän täêmin itelüe cähätennän dä möhim buluın belderde.

Törki däwlätlär oyışması qısalarında awıl xucalığı sänäğäte kompleksınıñ üsterelüe mäs’äläse quzğatılğan cıyılış axırında äğ’za illär urtaq beldergegä qul quydı.

Beldergedä taraflarnıñ, tafsille räweştä fiker belän almaşıp, awıl xucalığı êşlänmälärendä ike yaqlı säwdäneñ arttırıluı, awıl xucalığın iminiyätläşterü (straxovkalaw) programmalarınıñ alğa êtärelüe häm bäyläneşle tarmaqta tikşerenü xezmättäşlegeneñ kiñäytelüe mäs’älälärendä kileşügä ireşüe citkerelde.

Cirle häm klimatqa nigezlängän awıl xucalığı produktları törlären saqlaw häm taratu öçen regional’ orlıq bankınıñ buldırıluına yüältelgän êşçänlekneñ alıp barıluınıñ ähämiyätenä tuqtalıp uzılğan beldergedä monnan tış Törki däwlätlär oyışması äğ’zaläre arasında urtaq sanlı awıl xucalığı mäğ’lümat platformasınıñ oyıştırıluın tizlätü mäs’äläsendä kileşengänlege bilgelände.

Beldergedä 2024nçe yılnıñ sentyabr ayınnan başlap ber yıllıq çor öçen Qazaqstannıñ Taraz qalasınıñ "Törki däwlätlär oyışması awıl xucalığı başqalası” dip iğ’lan itelüe häm awıl xucalığı ministrlarınıñ çirattağı cıyılışınıñ da Qırğızstannıñ Çolpan Ata qalasında oyıştırıluı qararına kilenüe iskärtelep uzıldı.