Azärbaycanda saylaw ütkärelä

Saylawçılar wazıyfasına qabat namzät bulğan xäzerge İlbaşı İlham Äliyev belän bergä tuplam 7 kandidat arasınnan Azärbaycannı 7 yıl buyı idarä itäçäk yaña Däwlät başlığın saylaw öçen tawış birä.

Tawış birü cirle waqıt belän säğät 08.00dä başladı.

6 million yarım terkälgän saylawçı bulğan Azärbaycanda il külämendä häm çit illärdä 6 meñ 500 saylaw ärcäse qorıldı.

Azärbaycannıñ Ärmänstan yawınnan azat itkän töbäklärdä dä saylaw ärcäläre açıldı. Bu räweşle 30 yıl aradan soñ berençe tapqır Azärbaycannıñ böten cirlärendä saylaw ütkärelä.

Çit ildä yäşäwçe Azärbaycan watandaşları isä ilçeleklärdä tawışların qullana ala.

Saylawnı törle xalıqara oyışmalardan häm illärdän yaqınça 800 çit il, 90 meñ cirle küzätüçe qarap bara. Cirle matbuğat belän bergä yaqınça 200 çit il jurnalistı da saylawnı küzätä.

Tawış birü cirle waqıt belän säğät 19.00da tögällänä.

Saylawda “Yaña Azärbaycan” partiyäseneñ namzäte xäzerge Däwlät başlığı Äliyev belän bergä “Milli front” partiyäse Ğomum başlığı Razi Nurullayev, “Böyek qorılış” partiyäse ğomum başlığı Fazıl Mostafa, “Böyek Azärbaycan” partiyäse ğomum başlığı Älşad Musayev, “Böten Azärbaycan xalıq frontı” partiyäse ğomum başlığı Qodrät Xäsänguliyev belän bäysez namzätlär Zahid Oruç häm Fuat Äliyev yarışa.