Fälästinlelär Dağıstanda êş belän täêmin iteläçäk

25 noyabr’dan bügengä qadär Dağıstan Cömhüriyätenä Ğazzädän êvakuaśiyalängän 150dän artıq qaçaq kilde.

Dağıstanda qorılğan êş törkeme bu keşelärne waqıtlıça ber qorılmağa urnaştırdı.

Kilüçelärneñ 70tän kübräge – balalar. Qaçaqlar arasında tabiblar, uqıtuçılar, tärcemäçelär häm lingvistlar bar.

Dağıstan Räise Sergey Melikov bolay dip belderde: “Kilüçelär yaña tormış başlap cibärergä teli, bez dä alarğa monıñ öçen yärdäm itärgä tiyeş.”

Monnan alda da Dağıstannıñ mäğarif häm fän ministrı Yax’ya Buçayev töbäkkä kilgän fälästinle balalarnıñ Gamiyah awılındağı mäktäp häm balalar baqçasına urnaştırıluın äytkän ide.

Dağıstan noyabr’ ayı urtalarında Ğazzägä 30 tonnadan artıq gumanitar yärdäm cibärde.