Qırım tatarı Ukrainanıñ saqlanu ministrı bulaçaq

Ukraina däwlät başlığı Volodimir Zelenskiy Qırım tatarı Röstäm Ömärovnı saqlanu ministrı itep quyu qararı çığaruın belderde. Ul bu xaqta sośial (социаль) media aşa da citkerde.

“Ukraina saqlanu ministrın üzgärtergä qarar qıldım. Oleksey Reznikov 550 könnän artıq däwam itkän kiñ külämle suğışnı kiçerde. Ministrlıqnıñ armiyägä qarata da, cämğıyät’kä qarata da yaña qaraş häm üzara bäyläneşneñ yaña formalarına ixtiyacı bar dip sanıym. Xäzer ministrlıqnı Röstäm Ömärov citäkläyäçäk” dide Zelenskiy.

Ul parlamentnıñ bu qararnı yaqlayaçağın ömet itüen belderde.

İsegezgä töşeräbez, Oleksey Reznikov 2021nçe yıldan birle Ukraina saqlanu ministrı wazıyfasında ide.

Ä Röstäm Ömärov kem soñ ul? 1982nçe yılda tuğan Ömärov Ukraina tarixında ministr wazıyfasına kereşäçäk täwge Qırım tatarı. Ul Qırım tatarlarınıñ liderı häm deputat Mostafa Abdulcämil Qırımoğlunıñ kiñäşçese. Moña qadär Ukraina däwlät milke fondı räise häm Ukraina ilbaşınıñ maxsus wäkile bulıp êşläde. Ömärov 2022nçe yılnıñ fevralennän birle Ukrainanıñ Rısiyä belän söyläşülär ütkärüçe törkemendä urın ala.