Äliyev: "Ärmänstan yöklämälärne ütämi"

Azärbaycan ilbaşı İlham Äliyev Ärmänstannıñ yöklämälärne ütämäwen äytte. Ul oçraşular öçen başqala Baqığa kilgän Franśiyäneñ Awrupa häm tışqı êşlär ministrı Katrin Kolonnanı qabul itte.

Azärbaycan ilbaşı apparatınnan yasalğan belderügä qarağanda, Äliyev oçraşuda Ärmänstan belän mönäsäbätlären bäyäläde. Ul İkençe Qarabax suğışınnan soñ uq Ärmänstan belän ber-berseneñ cir bötenlege häm suverenlığın tanuçı solıx kileşüe imzalarğa täq’dim itülären, monıñ öçen Yerivanğa räsmi bularaq 5 töp prinśip kürsätülären xäterlätte.    

“Ärmänstan yöklämälärne cirenä citkermi. Ul Naxçivan belän ber koridor oyıştırıluına röxsät birmi. Rusiyä tınıçlıq köçläre waqıtlıça bularaq urnaşqan Azärbaycan cirlärennän ğaskärlären çığarmıy,”-dide Äliyev.

Ul ärmännärneñ Qarabaxqa qoral häm başqa suğış kiräk-yarağı kiterü öçen Laçın koridorın qullanuın belderde. “Laçın-Xankendi yulı başında çik buyı kontrol’ noqtası tözelü ilebezneñ suverenlıq xoquqı häm cir bötenlegebezneñ täêmin itelüneñ çağılışı,”-dide Äliyev.

Franśiyä ministrı Kolonna isä ileneñ Azärbaycanda häm, ğomumän, Kön’yaq Kavkaz regionında tınıçlıq, iq’tisadi häm sośial’ üseş teläwlären, härwaqıt monı maqsat itep quyuların söyläde.