Toqayıv: “Qazaqstannıñ xalıqara arenadağı ixtiramlığınıñ arttırıluına ähämiyät birelergä tiyış”

Toqayıv däwlätneñ böten yuğarı däräcäle organnarı belän ilneñ sośial’-iq’tisadi üseşenä qağılışlı cıyılış ütkärde.

Qazaqstannıñ sośial’ häm iq’tisad ölkäsendäge problemalarına tuqtalıp uzuçı Toqayıv iske programmalarnıñ xäzerge çorda inde funkśional’ bulmawın häm il öçen yaña milli üseş planınıñ qamilläştereläçägen äytte.

Qasıym Cumart Toqayıv, xäzerge waqıtta dönyada säwdä kirtäläreneñ artuın häm däwlätlär arasındağı ike yaqlı ışanıçsızlıqnıñ üsüen telgä alıp, azıq-tölek êşlänmälärendä äle haman çitkä bäyle buluların, xökümätneñ iñ möhim prioritetınıñ cirle citeşterü öleşen arttıru buluın belderde.

Toqayıv, "kapitalın çit ilgä küçerüçelärgä” dä möräcäğät itep, ilgä kapital salğan oçraqta alarğa qarata bernindi çaranıñ kürelmäyäçäge wäğ’däsen birde.

İlbaşı Toqayıv, dönyada citdi üzgäreşlärneñ yäşänüenä iğ’tibarnı yünältep: “Şuña kürä êçke iminlek, saqlanu säläteneñ nığıtıluı, Qazaqstannıñ häm böten Urta Aziyanıñ xalıqara arenadağı ixtiramlığınıñ arttırıluına xosusıy ähämiyät birelergä tiyış,” – dip bäyäläw yasadı.