Bäyrämov: “İllärebez zur potenśialğa iyä”

Bäyrämov Türkiyä Tışqı êşlär ministrı Mäwlüt Çavuşoğlu häm Törekmänstan tışqı êşlär ministrı Raşid Märädov belän Avaza töbägendä ütkärelgän Türkiyä-Azärbaycan-Törekmänstan Däwlät başlıqlarınıñ berençe sammitınnan soñ oyıştırılğan urtaq matbuğat oçraşuında çığış yasadı.

Yuğarı däräcäle oçraşunıñ möhimlegenä işarät itüçe Bäyrämov: "Tarixi kön yäşibez. Azärbaycan, Türkiyä häm Törekmänstan liderları täwge tapqır öç yaqlı sammitta oçraştı. Zur äzerleklär, här ölkädä kiñ qırlı söyläşülär ütkärelde,” – dip bäyäläw yasadı.

Bäyrämov, Azärbaycan, Türkiyä häm Törekmänstan liderlarınıñ yuğarı däräcäle oçraşuda xalıqlar arasındağı tarixi duslıq häm qardäşlek bağlanışlarına basım yasawına iğ’tibarnı yünältep: "Bu bez bergä başqaraçaq êşlärneñ iñ tabiğıy nigezen täşkil itä”, - dip äytte.

Öç il arasında xalıqara platformalarda ike yaqlı fayda täêmin itkän xezmättäşlekneñ urnaştırıluına basım yasawçı Bäyrämov monı däwam itteräçäklären belderde.

Sammit qısalarında ênergetika, transport häm logistika belän bergä törle ölkälär belän bäyle söyläşülärneñ ütkärelüen añlatuçı Bäyrämov: "İllärebezneñ bügenge köndä ayıruça ähämiyätle bulğan yök taşu, tranzit häm logistika mömkinlekläre zur potenśialğa iyä. Şuşı potenśial yärdämendä Türkiyä, Kön’yaq Qavqaz häm Xäzär diñgeze aşa Awrupa belän Urta Aziya arasında säwdä yulların buldırıp, xezmättäşlegebezne tağın da nığıtırğa mömkin. Bu yul tarixi yefäk yulınıñ marşrutlarınnan berse,” – dip bilgeläp uzdı.