Bolğar däwlätendä İslam dinen qabul itüneñ 1100 yıllığı bilgeläp ütelä

Bügen Tatarstanda İdel buyı Bolğar däwlätendä İslam dinen qabul itüneñ 1100 yıllığı bilgeläp ütelä. Älege ähämiyätle datağa bağışlap şaqtıy proyekt tormışqa aşırıla. Şularnıñ berse -Qazan şähäre Cämiğ’ mäçeteneñ nigez taşın salu tantanası. Şulay uq, Tatarstan başqalasında tatar din ähelläreneñ 12nçe Bötenrusiyä qorıltayı uzdı. Yubiley xörmätenä cömhüriyät häm il külämendä fänni häm mädäni çaralar oyıştırıla, tanılğan islam dine belgeçläreneñ kitapları basıla, forumnar uza.

İslam dinen qabul itügä 1100 yıl tulunıñ iñ kürkäm tantanası isä bügen borınğı Bolğar qalasında ütä. “İzge Bolğar cıyını” 1989nçı yıldan birle uzdırıla. Yubiley uñayınnan ul tağın da külämle häm istälekle itep oyıştırıldı.  

Tatarstan ilbaşı Röstäm Miñnexanov älege data nisbätennän qotlawların citkerä. Ul 922nçe yılda irekle räweştä qabul itelgän häm Rusiyägä kerüçe küp kenä xalıqlarnın ğasırlar däwamında saqlağan islam dineneñ - Rusiyä möselmannarınıñ bay mirası buluın assızıqlıy.