“Qıtay üz bazarın Urta Aziyäğä açarğa äzer”

Qıtay Däwlät başlığı Şi Cinping 5 Urta Aziya ileneñ liderları belän oyıştırılğan onlayn sammit uzdırdı.

Qıtay belän Urta Aziya illäre arasında diplomatik mönäsäbätlär urnaşuınıñ 30 yıllığı uñayınnan oyıştırılğan yuğarı däräcäle oçraşuda Qazaqstan İlbaşı Qasım Cömärt Toqayev, Qırğızstan Däwlät başlığı Sadır Caparov, Tacikstan Däwlät citäkçese İmamali Rahman, Üzbäkstan Däwlät räise Şäwkät Mirziyayev häm Törekmänstan Däwlät başlığı Gurbanguli Bärdimöxämmädov qatnaştı.

Şi, Qıtay häm Urta Aziya illäreneñ soñğı 30 yılda xalıqara êlemtälärdä ürnäk bulırlıq yaxşı mönäsäbätlär üsterüen belderep, şuşı uñış sereneñ ike yaqlı xörmät, yaxşı kürşe mönäsäbätläre, awır waqıtlarda teläktäşlek häm ike yaqlı faydağa bäyle buluın belderde.

Qıtaynıñ töbäkneñ totrıqlılığın häm üseş aluın yaqlawına basım yasawçı Şi: "Xalıqara şartlar nindi genä bulmasın yäki Qıtay ni çaqlı ğına üsmäsen, daimi räweştä Urta Aziya illäreneñ ışana alaçaq yaxşı kürşe, urtaq häm qardäş il bulırğa däwam itäçäkbez”, - dip äytte.

Qıtaynıñ Urta Aziya illäre belän mönäsäbätlärne tağın da kübräk üsterergä häm bergä urtaq kiläçäk tözergä teläwlären citkerüçe Şi yaña tör koronavirus (Kovid-19) vakśinası, daru häm kizüdän saqlanu äyberläre belän täêmin itü mäs’äläsendä töbäk illärenä yärdäm süzen birde.

Şi Qıtay belän Urta Aziya illäre arasındağı säwdäneñ illärneñ bäysez buluınnan soñ uzğan 30 yılda 100 märtäbä artuın, Pekinnıñ töbäk illärendäge turıdan-turı investiśiyäläreneñ isä 14 milliard dollarğa citüen dä äytep uzdı.

Qıtaynıñ 2013nçe yılda Qazaqstanda oyıştırılğan cıyılışta täwge tapqır täq’dim itkän Poyas häm yul iniśiativası qısalarındağı proyektlarnıñ Qıtay häm Urta Aziya illäre arasındağı iq’tisadi êlemtälärneñ üsüe öçen açqıç üzençälegendä buluına basım yasawçı Şi Qıtaynıñ kiñ bazarın Urta Aziya êşlänmälärenä açırğa äzer buluın, ike yaqlı säwdäneñ 2030nçı yılğa qadär 70 milliard dollarğa citkerüne maqsat itülären iskärtep uzdı.