Qazaqstanda xökümät tarqaldı

Qazaqstanda başministr Askar Mamin citäkçelegendäge xökümät ildä sıyıqlaştırılğan gaz bäyäläre artuğa qarşı protestlar arqasında wazıyfasınnan kitte. İlbaşı Kasım Cömärt Tokayev irtänge säğat’lärdä xökümätneñ êştän kitüen rasladı.

Räsmi mäğ’lümatlarğa qarağanda, xökümät räise wäkile wazıyfasın monnan alda viśe-prem'yer bulğan Alixan Smailov başqaraçaq.

Rizasızlıq çaraları Qazaqstannıñ könbatışındağı Jañaözen şähärendä başlana. Şunnan soñ ul il külämenä tarala. Almata şähäre häm Mangistaw töbägendä ğadättän tış xäl iğ’lan itelde. İlbaşı Tokayev imzalağan qarar nigezendä, älege cirleklärdä cämäğat’çelek tärtiben saqlaw awırlaşu arqasında 5nçe ğıynvardan 19ına qadär komendant säğate kertelde.

İlneñ êlekkege başqalası Almatada meñnärçä keşe qatnaşındağı rizasızlıq çaraları tön buyı däwam itte. Poliśiyä alarğa tawış bombası häm küz yäşen çığaruçı gaz belän qarşılıq kürsätte.

Qazaqstanda sıyıqlaştırılğan benzin gazı bäyäläre ber litr öçen 60 täñkädän 120 täñkägä kütärelgän ide.

Waqıyğanı kontrol’dä totu öçen tözelgän maxsus xökümät komissiyäse Aqtawda protestçılar belän oçraşıp yağulıq bäyäsen 50 täñkägä töşeräçäklären belderde. Tik bu rizasızlarnı tınıçlandıru öçen citärlek bulmadı. Uramğa çığuçılar ildä xäzerge idarä sistemasın tänqıyt’läwçe säyäsi şiğar’lär qıçqıra häm xalıqnıñ sośial’ -iq’tisadi xälen yaxşırtunı taläp itä.