Tınğı belmäs Älmirä Ädiyätullina kitte...

Tatar xalqınıñ kürenekle cämäğat’ êşleklese, jurnalist Älmirä Ädiyätullina wafat. Ul bügen 83 yäşendä baqıylıqqa küçte. Älmirä xanım soñğı ike yılın qatı awırıp urın östendä kiçerde.

Älmirä Ädiyätullina 1965nçe yılda Qazan däwlät universitetınıñ jurnalistika fakul’tetın tämamlıy. Ul bik küp basmalarda êşli, törle oyışmalarda matbuğat xezmäten citäkli. Tınğı belmäs, milli ruxlı xanım tatar telen, mäğarifen yaqlawğa bik küp köç quydı: mitinglar oyıştırdı, mäxkämälärdä xoquq dawladı, citäkçelekkä xatlar yazdı. Möselman xatın-qızlar öçen yawlıq bäyläp pasportqa fotoğa töşü xoququın da ul yawlap aldı.

Älmirä Ädiyätullina 1980nçe yıllar axırı-1990nçı yıllar başında milli xäräkätne kütärüçelärneñ berse ide.