Ärmänstan ciñelüen qabul itte

Ärmänstan Azärbaycanğa ciñelüen qabul itte. Xökümät räise Nikol’ Paşinyan sośial’ media aşa yasağan belderüendä: “Rusiyä häm Azärbaycan belän (Tawlı Qarabaxtağı) suğışnı beterü öçen kileştek,”-dide.

Anıñ qayber süzläre iğ’tibarnı cälep itä. “Rusiyä liderı Vladimir Putin häm Azärbaycan ilbaşı İlham Aliyev belän ytnı tuqtatu öçen urtaq deklaraśiyä imzaladıq. Başqa yulım yuq ide. Bu minem häm Ärmänstan xalqı öçen bik awır,”-di Paşinyan. Ul qararnıñ tirän analizlar häm xärbi wäzğıyät’ne belüçe şäxeslärneñ bäyälämäläre nigezendä birelüen dä äytä.

Paşinyan il xalqınıñ üzenä protest belderüenä qarata isä: “Xalıqnı fetnägä êtärüçe här keşe xökemgä tartılaçaq,”-di.

Ärmänstan saqlanu ministrlığı süzçese Şuşan Stepanyan Tawlı Qarabax regionında xärbi çaralarnıñ tulısınça tuqtatıluın, bäreleş cirleklärendä irtänge säğat’lärdän ük tınıçlıq urnaşuın äytte.

Ärmänstan ğomumştab idaräse Karabax mäs’äläsendä il idaräseneñ qararların cirenä citkeräçäklären assızıqladı. “Bez qan ağunı tuqtatırğa mäcbür,”-diyelä annan yasalğan belderüdä.

Şul uq waqıtta, başqala Yerivannan başlap böten Ärmänstanda Paşinyanğa qarşı rizasızlıq çaraları däwam itä. Protestçılar başta xökümät yortın bastı, annarı parlament binasına kitte. Alar Paşinyanğa qarşı şiğar’lär qıçqırdı.

Parlament tribunasına çıqqan qayber protestçılar Qarabaxtağı suğışnı däwam itärgä çaqırdı.

Sośial’ mediadağı videolarda Ärmänstan parlamentı räise Ararat Mirzoyannıñ höcümgä duçar buluı häm yaralanuı kürenä.

Azärbaycan armiyäse Tawlı Qarabaxta 30 yıl däwam itkän ärmän okkupaśiyäsen beterü öçen 27nçe sentyabr’dän birle operaśiyä alıp bardı.