Törki şura cıyılıştı

Törkiyä ilbaşı Räcäp Tayyip Ärdoğan törki däwlätlärgä koronavirus belän köräşne däwam itkän arada kizüdän soñğı wäzğıyät’kä dä xäzerlänergä kiräklegen belderde. Ul Törki tellärdä söyläşüçe illärneñ xezmättäşlek şurasınıñ Kovid-19 pandemiyäse belän köräşkä bağışlanğan çirattan tış videokiñäşmäsendä çığış yasadı.

Törkiyä ilbaşı böten keşelek dön’yasınıñ xäzerge waqıtta küzgä kürenmäs dosmanğa qarşı awır suğış alıp baruın, Törki şura sammitınıñ bu köräştä xezmättäşlek itüne küz uñında totaçağın citkerde.  

“Bu qıyın çordan tağın da köçäyep çığaçağıbızğa ışanam,”-dide Ärdoğan.

Ul Törkiyäneñ virus tarala başlağan könnän ük çaralar kürüen, xäzergä qadär zur problemalar çıqmawın söyläde.

“Üz ixtiyaclarıbıznı qanäğat’länderüdän tış, qardäşlärebezneñ yanında da bulırğa tırışabız. Sezdän kilgän üteneçlärgä östenlek biräbez,”-dide Törkiyä ilbaşı.

Ul kizü täêsire astında ber ük waqıtta dön’yaküläm sośial’- iq’tisadi krizis başlanuın assızıqladı.

Transport, tamğaxanä, çik buyı kiçüläre şikelle mäydannarda, xalıq sälamätlegen isäpkä alıp, iñ praktik çaralarnı tormışqa aşıru möhim. Ärdoğan bu nisbättän Törki şura däwlätläreneñ transport häm säwdä ministrlarınıñ videokiñäşmäsen ütkärergä täq’dim itte.

“Koronavirus belän köräştä hiçşiksez ciñäçäkbez,”-dide ilbaşı.

Ul kizüdän soñğı tormış öçen xäzerlek yasaw kiräklegen dä xäterlätte. Törkiyä ilbaşı sälamätlek saqlaw, säwdä, iq’tisad, sośial’ psixologiyä tarmaqların berdäm räweştä qarap çığarğa, xezmättäşlek ölkälären tabıp kiräkle adımnarnı tiz räweştä yasarğa çaqırdı.