Törkiyädän Boxarağa çarter oçışlar başlandı

Atnağa ike tapqır yasala torğan säfärlär ikeyaqlı turizmnı üsterü öçen êşlänä

Törkiyädän Boxarağa çarter oçışlar başlandı

İstanbuldan Üzbäkstannıñ tarixi Boxara şähärenä turistik çarter oçışları başlandı. Berençe säfär aldınnan tantana oyıştırıldı. Oçqıçnı Boxara mêrı urınbasarı Batır Şaxriyarov, şähär xakimiyäte başlığı Kärim Kamalov, töbäkneñ turizm mödire Furkat Xocayev häm başqa wäqalätlelär qarşı aldı.

Tantanada Törkiyä yağınnan da wäkillär küp ide. İlbaşınıñ baş kinäşçese İsrafil Kışla, Diniyä näzärate başlığı kiñäşçese Xäydär Bäkiroğlu, Atlas Global hawa yulları şirkäte kordinatorı Orxan Sancar häm Törkiyädä êşçänlek alıp baruçı dini turizm agentlıqlarınnan wäkillär qatnaştı.

Çarter oçışlarınıñ İstanbul koordinatorı İxsan Kurt beldergänçä, kiteşli İstanbuldan Boxarağa oçaçaqlar, qaytışta isä Sämärkandtan quzğalalar. Ul älege säfärlärneñ ikeyaqlı turizmnıñ üseşenä öleş kertäçägenä ışanuın da äytte.  

Oçışlar atnada ike tapqır ğamälgä aşırılaçaq. Taläplär bulsa, Üzbäkstannıñ başqa tarixi şähäre Xivağada çarter oçışları açarğa planlaştıralar.  

İstanbul-Boxara çarter säfärläre Üzbäkstan xökümäte tarafınnan ilneñ Boxara, Termez, Karşı häm Nukus aêroportları öçen kertelgän “açıq kük yöze” programmasın başlap cibärde.



Bäyläneşle xäbärlär