Antaliyada Tuqay därese

Urta diñgez buyındağı Antaliya qalasında 20nçe aprel’ könne Ğabdulla Tuqayğa bağışlanğan açıq däres ütkärelde.

Fänis Zıyalı xäbär itüençä, törle qızıqlı uyınnar belän aralaştırılıp Xälidä Äxmätova alıp barğan şuşı açıq därestä Antaliyada yäşäwçe tatar balalarınıñ äti-äniläre dä qatnaştı.

Balalar Tuqay şiğirlären uqığan däres waqıtında Fänis Zıyalı “Par at” şiğeren uqıdı häm qurayda uynadı. Abdulxalik bäy üzeneñ bayanı belän qunaqlarnıñ küñelen yawladı.

Tuqay äkiyätlärenä räsem kürgäzmäse dä oyıştırılğan därestä qatnaşqan balalarğa büläklär tapşırıldı.

Tatarstannan kilgän Qazannıñ 165 nçe mäktäp direktorı Aydar äfände isä balalarğa kitap tarattı. Qazannıñ 165nçe mäktäbe belän Antaliya tatarlarınıñ “Tuğan tel” sıynıfı belän kileşü tözelde.

Çara axırında xatın-qızlarnıñ peşerep alıp kilgän täm-tomnar belän çäylär êçelde.