Ärdoğannıñ Azärbaycanğa säfäre

İlbaşı Räcäp Tayyip Ärdoğan dus häm qardäş il - Azärbaycanda. Anı Baqıda räsmi tantana belän qarşıladılar. Soñınnan Ärdoğan Azärbaycan ilbaşı İlham Aliyev belän küzgä-küz oçraştı. Anda ike aradağı mönäsäbätlärneñ häm xezmättäşlekneñ tağın da üsüe öçen yasalaçaq adımnar xaqında söyläştelär.

İlbaşı Ärdoğan Baqınıñ azatlığının 100 yıllığı tanranasında çığış yasap: “Tawlı Karabax mäs’äläseneñ çişelüe -Ärmänstan belän mönäsäbätlärebezneñ tözälüeneñ töp şartı, monı bolay belergä tiyeşlär,”-dide.

“Monnan barı tik 25 yıl êlek Xocalıda bulğannarnıñ, Tawlı Karabaxta üterelgännärneñ cawaplılığın almawçılar, üterüçelärne kaharman iğ’lan itüçelär bezgä tarix därese birä almas,”-dip däwam itte Törkiyä ilbaşı.

Ärdoğan Azärbaycannıñ märxüm ilbaşı Xäydär Aliyevnıñ qabere belän törek häm azärbaycan şähitleklären zıyarät itte.

İke ilbaşı Baqı törek şähitlegendä häykälgä çäçäk quydı häm istälek däftären imzaladı.

Ärdoğan anda şul süzlärne yazdı: “Ğaziz şähitlärebez, monnan näq’ ber ğasır êlek möbaräk qannarığız belän yazğan böyek ciñü häm Baqınıñ azatlığın bügen zur räxmät belän iskä alabız. Bezgä ämanät itkän qardäşlekne kiläçäkkä iltü öçen Törkiyädä häm Azärbaycanda bar köçebezgä tırışlıq quyabız. 1991nçe yılda qabat bäysezlegen iğ’lan itkän Azärbaycan ilebezneñ yärdäme belän töbäkneñ totrıqlılıq häm ışanıç simvolı bularaq här tarmaqta zur uñışlarğa ireşä. Ruxığız şat bulsın”.

İlham Aliyev isä istälek däftärendäge yazmasında 100 yıl êlek bäysezlek häm azatlıq köräşendä ilenä yärdämgä kilep şähit bulğan törek xärbiläreneñ xätere üzläre öçen ğaziz buluına basım yasadı. Ul Azärbaycan däwläte häm xalqınıñ bäysezlek öçen canın fida itkän törek qardäşläreneñ êşenä zur ähämiyät birüen assızıqladı.