Qırğızstannan törek investorlarına möräcäğat’

Qırğızstan ilbaşı Sooronbay Cäänbäkov törek investorların Qırğızstanğa çaqırdı. Bu xaqta ul Bişkäktä uzğan Qırğızstan-Törkiyä êş forumında belderde.

Cäänbäkov Ärdoğanğa zıyaräte öçen räxmät äytep: “Sezneñ kilüegez törek investorlarına ömet birde. Bu forumda çınlap torıp köç quyıp illäreneñ ayaqqa basuına zur öleş kertüçelär qatnaşa,”-dide.  

Cäänbäkov forumnıñ ike däwlät iq’tisadınıñ üseşenä çara bulacağına şiklänmi. “Qırğızstan belän Törkiyä arasında ışanıç barlıqqa kilde. İkeyaqlı mönäsäbätlärebez bik äybät üsä,”-dip söyläde ul. Xäzerge waqıtta ike aradağı säwdä äyläneşe 356 million dollarğa yaqınlaştı. Ämma liderlar mömkinleklärneñ äle küp buluın häm barısın da qullanırğa kiräklegen assızıqlıy. Säwdä äyläneşen 1 milliard dollarğa citkerü burıçı quyıldı.  

Qırğızstanda Törkiyä êşmäkärläre yözlärçä proyekt tormışqa aşırdı. 1995nçe yıldan birle alar älege ildä 500 million dollardan artıq investiśiyä yasağan. Cäänbäkov töreklärne ciñel sänäğat’ häm turizm tarmağına öleş kertergä çaqırdı.

Ul, şulay uq, Qırğızstannan Törkiyägä êkologik yaqtan çista awıl-xucalığı tovarların kertergä teläwlären dä söyläde.